中環出更：施榮恆笑開顏

Ivan嘅主席任期已過咗三分之二，佢認為成績尚算唔錯，事關佢完成咗上任時講過一定要做嘅事，就係將總理要在四年內升呢做副主席，否則就要退出董事局嘅期限，成功延長至五年。Ivan亦賣口乖話，做主席呢段時間好忙，為免太太詐型，落莊後都要抽時間陪吓太太同小朋友。

東華總理廖偉麟及表妹兼仁濟醫院總理湯振玲（Jacqueline）都入場玩，卓妮見Jacqueline同東華總理楊嘉成好啱傾，原來兩人都係運動愛好者。Jacqueline一向好鍾意踩單車，仲周圍征戰，不過佢笑笑口話，最近想跟楊嘉成學跑馬拉松，事關女仔唔應該踩咁多單車，因為會踩粗隻腳喎！

梁許安璞（右）近排鑽研韓國菜式，梁智仁可以大飽口福。（葉華英攝）

湯振玲（右）心思思想跟楊嘉成（左）學跑馬拉松。

梁智仁妻愛煮韓餐

醫院管理局主席梁智仁同太太梁許安璞（Annie）亦有到場，近排香港勁吹韓風，一向煮嘢好耍家嘅Annie都唔執輸，不過就唔係貪靚嗰種，而係醉心鑽研韓國食譜，特別係石頭鍋飯。Annie煮嘅石頭鍋飯有一個好特別嘅心思，就係用可用廚餘做材料，符合佢着重環保同健康嘅烹飪原則，睇嚟梁智仁可以大飽口福喇！

卓妮