政情：新同盟陰招搶鴿？
明年將舉行區議會選舉，唔少政黨紛紛喺地區插旗，諗住先拔頭籌。因地區插旗多次爆發不和嘅民主黨（白鴿黨）同埋新民主同盟（新同盟），近排敵對態勢有升溫趨勢。事關有幾名白鴿黨地區中人近日退黨轉投新同盟陣營，不過有人未完成退黨手續，就用新同盟嘅牌頭喺地區搞宣傳活動，激到白鴿黨紮紮跳。
近排全城焦點集中喺佔領行動，有白鴿黨成員趁形勢立立亂，悄悄加入新同盟，包括立法會議員單仲偕一名姓湯嘅助理。聽聞呢位助理未完成退黨手續，就已經為新同盟做嘢，嬲到飛起嘅白鴿黨鬧爆新同盟用陰招搶人，唔得光彩，又批評退黨者係叛徒、反骨仔。單仲偕證實，該名助理已經口頭同佢講會退黨，不過由於佢未搞掂退黨手續，所以暫時仍然係白鴿黨黨員。單仲偕又話，會將件事交由紀律委員會決定是否處分。
范國威斥賊喊捉賊
新同盟范國威（Gary）就解釋話，據知嗰位姓湯助理已經向白鴿黨提交退黨信，有權加入其他政黨。佢又否認新同盟搶白鴿黨人，辯稱既然有人去意已決，白鴿黨有乜理由要對人作出紀律處分。佢愈講愈嬲，話白鴿黨賊喊捉賊已經唔係第一日嘅事，好似將軍澳軍寶選區，明明民主動力已經將嗰區判咗畀佢哋，但白鴿黨竟然當唔算數，呢種行徑係既小氣又無黨格喎！
四年前政改一役，白鴿黨臨時轉軚支持方案，除咗流失大批支持者外，黨內部亦爆發退黨潮。當中Gary聯同廿幾位黨員齊齊退黨，另起爐灶成立新同盟。其後Gary多次高調批評白鴿黨，所以唔少白鴿黨中人對佢恨之入骨，批評佢忘本、背信棄義。正因為呢段恩怨，多年來兩黨上至政策議題、下至地區事務，不時針鋒相對，喺區議會選舉亦不時出現搶區情況，仲因此而鬧上負責協調泛民區議會選舉嘅民主動力。雙方舊恨未解，今次又結新仇，真係一對冤家。