中國人自古重視上慈下孝，做長輩嘅要關心年輕人，年輕人要尊重長輩。可惜吖，一場佔領之亂，搞到代際關係非常之咁緊張，有後生仔仲大大聲話「終有一天我們將決定你們（上一代）的未來」添，你話幾咁囂張無禮吖。
嗱，話口未完又嚟嘞。話說最近有位年輕單車男被指撞跌過馬路嘅長者，非但冷血不顧而去，仲掉轉頭指摘老人亂過馬路，將行車紀錄片段放上網，結果畀一眾網民狂轟濫炸兼大起底。可能眾怒難犯啩，單車男澄清係無心之失，話當時睇唔到老人家跌低至繼續行車，事後已經向警方講出事發經過喎。
即係咁，呢單嘢嘅是非曲直，仲要等警方查過至知，但有一點可以肯定，如果唔係年輕人普遍畀人無禮貌同自我中心嘅印象，網上就唔會一面倒鬧爆啦。正如有網民話齋，香港地年輕人欠缺包容、尊重同反省，只要覺得自己啱，就可以肆無忌憚，做錯事仲以為自己係英雄，真係一啲都冇講錯。
話時話，佔領運動將部分年輕人嘅問題一次過暴露晒出嚟，又真係幾似照妖鏡o架。唔係咩，班佔友開口公義埋口民主，但所作所為其實啱啱相反。霸佔街道阻人搵食搞到天怒人怨，名為「鳩嗚」實際係去人哋舖頭搞搞震，商舖見到呢班瘟神就怕怕，落閘都落唔切，唔通損人不利己都叫「公義」？仲有吖，無論民調抑或簽名運動，主流民意都係希望佔領鬧劇盡早收皮，點知佔友一於少理，一意孤行，唔通咁都叫「民主」？
最難頂嘅係，有啲人口口聲聲話要對得住下一代，但係香港畀佢哋咁搞一搞，經濟大受打擊，幾代人辛苦建立嘅法治觀念更係一鋪清袋，唔怪得有人話，應該反問佢哋對唔對得住上一代就真。
所以話啫，呢班年輕人既暴戾又偏執，為達目的不擇手段，遇神殺神遇佛殺佛，佢哋眼中又點會有其他人吖。最經典例子係近年大學畢業禮一再淪為政治爛騷嘅舞台，舉遮拉橫額做粗口手勢樣樣齊，至於其他家長同學生咯喎，當然要犧牲小我，成全呢班民主鬥士嘅大我啦。再簡單啲，大家平日上公共交通工具睇吓，一有長者上車，唔少後生仔女即刻好似參加咗扮嘢大賽咁，唔係詐瞓就係詐睇手機，想搵個人讓座都難。今時今日愈來愈多年輕人被批評係憤青同廢青，係就係有啲一竹篙打一船人，但唔係完全冇道理o架！
一句到尾，民主唔單止係制度，更加係一種生活方式，有啲人連包容同尊重都未識，畀個真普選佢哋又有咩用吖！