公民黨尋晚召開黨員大會，選出新一屆領導層，但佢哋嘅最高領導層都係由上一屆連任，即余若薇繼續擔任主席，立法會議員梁家傑照舊做黨魁，陳淑莊同陳清橋就分別擔任外務副主席同內務副主席，可以話係舊酒新瓶。不過，喺人大「八．三一」決定後話「萬念俱灰」，要專注民生嘅議員湯家驊似乎就連黨務都淡出埋，唔止交棒畀楊岳橋做新界東支部主席，就連執委名單上都冇佢個名。
此外，該黨任職飛機師嘅譚文豪（Jeremy）同東區區議員黎志強亦都冇再擔任執委工作。Jeremy話，明年就係區議會選舉，希望專注地區工作，而且已為人父嘅佢亦要花多啲時間湊對BB咁話。至於○八年出選立法會新界東嘅曾國豐亦都回巢擔任執委。而執委梁穎敏就冇做青年公民主席喇，改為由港島區支部嘅鄭達鴻接棒。