政情：佔中雀局政府等食胡
佔領行動拖拉至今已強弩之末，政府與泛民主派之間角力誰勝誰負，民意係其中一個重要籌碼。有政府高官就以攻打「四方城」妙論佔領行動，指政府其實做乜都蝕章，皆因佔中三子、雙學及泛民政黨夾實政府嚟打，政府幾次「出沖」都變「全沖」，一家賠三家。相反泛民出沖就由三家夾份付鈔，政府以寡敵眾肯定輸蝕。因此政府交足學費後學精咗，寧願打持久戰打多幾圈，等食胡博翻盤。
呢位高官以政府九二八當日「頭炮」投擲催淚彈驅散群眾為引子，指政府多年來極少出動催淚彈，警隊自然誤中副車，第一鋪已經出沖畀泛民三家食咗鋪地胡。其後警方屢次施放胡椒噴霧、催淚水劑，又被指出動警棍，政府連出幾次大沖，泛民點會唔食過翻尋味呢？
不過，泛民過去兩月亦曾多次不按牌理出牌，甚至調返轉出沖畀政府，好似佔領人士衝擊立法會大樓、雙學發動圍堵政府總部等被指「暴徒」嘅行為，都令民意急轉彎，畀政府食番鋪「雙辣」，但三為一體嘅泛民每人夾三分一就已經夠找數，認真抵玩。
冇咁易上泛民當亂出沖
政府深明佔中搞手嘅目標不止於爭取真普選，佢哋眼見政府咁有「牌品」唔肯反枱清場離開，間唔中都搵啲訴求爭取吓，好似要求高官落台咁，目的都係想逼政府嬲到跳起出錯牌，甚至上演一場血腥鎮壓，咁就正中泛民下懷嘞。
當然，政府亦絕非省油的燈，深明泛民係雀局老手，當然冇咁易上當啦，所以決定重整旗鼓、唔再亂咁出沖，寧願打持久戰陪泛民慢慢玩，打八圈唔夠，就打夠十六圈甚至三十二圈，靜候民意逆轉嘅食胡好時機，話唔定食番鋪大四喜，一鋪贏返晒。
事實上，泛民三家已隨着時間愈打愈「謝」，無不想快啲打完，甚至有人唔想再打落去。所以話呢，當初泛民見好就收，都叫做「割禾青」有番多少落袋，再打落去分分鐘衰收尾輸凸都有之。