中環出更：講起黃之鋒發叔問「咩人」
學民思潮召集人黃之鋒絕食四日後捱唔住，宣布停止絕食，之前唔少政界人士都先後「探望」之鋒話要向政府轉達訊息。新界鄉議局主席劉皇發（發叔）同沙田鄉事委員會主席莫錦貴當然有留意之鋒消息，發叔仲話睇見之鋒「面青青」，着對方注意身體。不過，被問到會否探望之鋒，發叔即時改口話唔識之鋒，反問「係咩人？」
同莫錦貴唱雙簧
發叔忽然扮失憶唔識之鋒係咩人，仲反問莫錦貴，之鋒係咪新界人嚟？莫錦貴亦配合發叔，回應話之鋒係「城市人」而唔係沙田友喎。發叔見之鋒原來唔係「自己人」，惟有話見到之鋒咪同佢傾吓囉！總之發叔全程同莫錦貴你一言我一語，唱雙簧寸之鋒。
由於莫錦貴以沙田鄉委會主席身份成為沙田區議會當然議員，近日佢就衝出排頭村鄉委會總部，選址禾輋邨開設議員辦事處，尋日終於開張，發叔例牌畀面撐場。
原來佢呢個新辦事處，係立法會工程界議員盧偉國做委任區議員期間，同另一位委任區議員余秀珠嘅聯合辦事處，盧以往同禾輋街坊朝見口晚見面，尋日重遊舊地都相當懷緬。
卓妮