中環出更：嫻姐做潮模行Catwalk
立法會議員喺議會內唇槍舌劍就見得多，但行Catwalk就難得一見。工聯會陳婉嫻尋日就為時裝表演活動「處女下海」擔任模特兒，一身潮流打扮嘅嫻姐相當搶眼，除咗着起一襲白色長衫，配襯蓮花造型嘅綠色紗裙，仲罕有地戴上畫家帽。雖然嫻姐動作有啲生硬，但有經驗豐富嘅製衣及紡織界議員鍾國斌（Felix）傍住，加上笑容十足，博得觀眾熱烈掌聲。
嫻姐同Felix為社企舉辦嘅時裝表演擔任嘉賓，展出嘅服飾都係出自修讀時裝設計嘅大專生。嫻姐話，好鍾意設計師為佢設計嘅服飾，唔單止線條靚，仲可以遮掩身形嘅缺點。佢同卓妮分享時裝心得時話，平日冇睇開時裝雜誌，打扮都係隨心，主要着西裝，夠晒四平八穩。不過，近期出入立法會都開始着重打扮，有時會着吓蝙蝠袖或有花紋嘅衫。
鍾國斌：學生作品未夠火候
Felix就透露，紡織界近半年同商務及經濟局傾緊啲計劃，政府亦成立咗時裝專案小組，相信有助本地時裝設計師發展。對於學生嘅作品，Felix就略嫌未夠火候，但佢都明白學生始終啱啱畢業，仲需要時間磨練。講開衣着品味，佢話每個人都有唔同嘅風格，最緊要係揀到適合自己嘅衫，「衫係好神奇嘅，可以凸顯出個人嘅優點，又可以隱藏缺點」。
Felix又話，身形肥胖嘅人唔一定要着鬆身衫，黑色衫加番啲設計都係唔錯嘅選擇，建議大家可以嘗試搵設計師執吓。勞工及福利局局長張建宗亦係嘉賓之一，唔知係咪出席時裝表演嘅關係，局長嘅衣着都花咗啲心思，例如戴咗一條淺黃色嘅花紋領巾，同埋着咗件金色鈕釦嘅西裝外套，有別於平日樸實沉悶嘅打扮。
卓妮