蚊子年年有，今年特別多。點解搞成咁？嗱，係人都知防蚊滅蚊係食環署嘅職責，點不知建築署同教育局等其他部門有時都要做埋呢瓣，各自為政咯喎，咪搞到蚊蟲孳生，居民受害囉。
話說牛頭角彩福邨有居民投訴，多年嚟一直飽受蚊患困擾，懷疑因為附近山坡到處係坑渠同雜草所致。彩福邨蚊患有幾嚴重？有街坊即使入冬都唔敢開窗，雖然屋企長期備有蚊香、蚊貼等，仍然頻頻中招，亦有喺邨內就讀嘅小學生一日就被咬超過廿粒蚊瘌，你都咪話唔得人驚吖。
蚊患咁犀利，苦主經過多番求助，先至發現「驚天大秘密」，原來個斜坡係由教育局、路政署、康文署同建築署等多個部門管轄，佢哋冇錯係有做滅蚊工作，但各有各做嗰度弊呢。好似教育局咁吖，佢哋話校方已經做足安裝驅蚊燈等預防措施，而建築署亦邀功話有定期灑蚊油同剪雜草。咦，咁就好笑嘞，學校有蚊患由教育局自己搞掂，如果按照呢個邏輯，係咪學校有賊，局長「吳得掂」就要親自帶隊緝兇呢？地區人士就講得啱嘞，咁大幅斜坡，淨係保持渠道暢通同滅蚊已經唔易，家陣仲要分咁多部門管，連唔擅長滅蚊嘅教育局都要落埋手，唔出事至奇喇。
當局滅蚊不得其法，唔怪得搞到登革熱再次大爆發啦。嗱，本港今年錄得三宗本地登革熱感染個案，加埋外地傳入嘅個案，已經破咗一百大關，隨時可能演變成風土病，港府見勢色唔對，上個月組成跨部門統籌委員會，食衞局、醫管局、衞生防護中心等部門阿頭坐埋一齊共商滅蚊大計，仲話之後會同十八區區議會代表會面添。咪睇港府係威係勢，戒備森嚴咁款，其實得個樣嘅咋。唔係咩，如果港府真係有同地方人士好好溝通，就唔會一幅斜坡嘅蚊患都搞唔掂啦，吓話！
講開又講，當局防蚊滅蚊不力已經係老問題，審計署最近就踢爆，食環署監察白紋伊蚊嘅誘蚊產卵器指數甩漏多兼唔到位，蚊杯唔係被破壞就係移咗位，擺放位置更加係十年如一日，你估啲蚊好似官僚咁蠢咩。所以話啫，官僚作風不改，唔理你幾高層牽頭統籌都係嘥氣嘅啫。大家有眼見，當年違規晾衫夠由貪曾出手啦，樹木管理夠由唐唐掛帥啦，咁多年過去嘞，萬國旗咪又係隨處飄揚，樹木咪又係長冧長有。
計功夫茶話齋，針唔拮到肉唔知痛，蚊唔叮到肉唔知慘，歡迎有關官僚去個斜坡度搭帳篷「佔領」兩日，親身感受吓居民苦況，或者之後就識落力滅蚊嘞！