渡海濠情：天蠍仔癡心情長

天蠍座嘅男士除咗性慾上特別旺盛之外，原來喺十二星座中一直都係以癡情見稱，佢哋對愛人嘅癡情表現，相信認咗第二，都冇人敢認第一，嚟自大富豪桑拿嘅珊珊就話：「就算同佢哋分手多年，仍然會不時出現嚟煩住你！」

控制欲強

珊珊話：「三年前我有一個男友就係天蠍座嘅，拍拖時覺得佢幾好，溫柔體貼，又懂得浪漫，而且不時都會有小驚喜，做女朋友唔冧都幾難，但有一日就被我發現佢同另一個女仔約會，只見個女仔又喊又鬧，原來呢個女仔就係佢嘅前女友，今次約佢出嚟見面係想要求復合，但佢郎心如鐵，一口就拒絕，前女友就算發晒爛渣佢都不為所動，起初仲以為佢對我情深義重，所以拒絕復合，即時加分，嗰晚約佢見面之後就畀佢去我屋企過夜，點知佢只係覺得前女友太愛花錢，當佢係提款機，所以主動提出分手，對於佢哋提出分手嘅人，佢哋一啲都唔會有癡情嘅表現！後嚟佢實在太癡纏，有好強嘅控制欲，令我感覺到一啲自由都冇，於是同佢喺埋半年左右，我就同佢提出分手！」

要求復合

由你提出分手，佢一定會纏住你唔放啦？珊珊話：「你講得啱，真係纏住唔放，天蠍座嘅男朋友有樣好，就係當佢得罪女朋友之後，佢好肯低聲下氣咁要求女朋友原諒，而且一次唔得就兩次，兩次唔得就三次，係要煩到你原諒佢哋為止，如果仲熱戀中，當然會心軟原諒佢，但如果已經此情不再決定分手，你再不厭其煩咁要求原諒或者復合，根本就強人所難，就算你同佢講幾多次道理都好，佢都覺得只係你一時意氣，只要誠意就會獲得原諒，唔怕話你知我前男友就係咁樣纏咗我兩年，直至我新男友出現，但呢一年雖然佢唔敢現身，但每逢重要日子賀卡短訊一定會到，只希望佢快啲搵個人嚟拍拖，有個愛嘅替身，就唔使再煩住我，否則，我睇佢癡纏到八十歲都有可能呀！」