立法會發展事務委員會日前開會討論東涌新市鎮擴展研究，話說田二少所得嘅資料顯示，東涌線可載客量係三萬人次，估計東涌新市鎮落成後最多都只可以增至四萬一千人次，但政府竟聲稱可載客量可達六萬六千人次。田二少質疑，何來計大一倍載客量？批評政府報大數，仲寸爆政府唔通興建緊一條神秘鐵路？政府後來就回覆話啲數據係港鐵提供嘅，又話加密班次可增加載客量喎。不過，正如田二少話齋，加密班次可以增加成倍載客量嘅話，咁就唔使起新鐵路啦！
