鄺俊宇被誤會拆鐵馬
白鴿黨黃碧雲尋日話，由於雨傘運動催生大批「雨傘仔」、「雨傘女」，建議佢哋參加明年舉行嘅區議會選舉，挑戰每屆都自動當選嘅建制派區議員，極有機會當選。被問到該黨會否吸納呢班年輕一代，黃就話佢哋都有意咁做，但就唔知人哋肯唔肯。
莫講話入黨，其實佔領人士鬧少該黨一陣已經偷笑。該黨元朗區議員鄺俊宇（Roy）早前喺網上引發一場小風波，話說佢喺佔領行動初期着住件糾察衫影咗張相，之後佔領區發生拆鐵馬事件，有網民以為佢去拆鐵馬。Roy話事件只係一場誤會，皆因佢喺拆鐵馬當日唔在場，事後亦不時落佔領區主持論壇同發言。唔知事件係咪證明網民對該黨議員都唔係好信任呢？