政情：梁世民促增牙科生學額
醫科生學額一向吃香，好似牙科生學額，每年僅得五十個位，同樣爭崩頭。隨着人口老化及內地求診病人激增，香港牙醫學會會長梁世民（Sigmund）話，牙醫已出現供不應求，促請當局增加學額，紓緩市場需求。
「現時市場缺百名牙醫」
睇牙醫有幾難？Sigmund話，普遍要輪候兩、三星期，如遇上急性牙痛，更係「一醫難求」。佢曾聽聞有病人因牙痛發炎弄至面腫腫，需緊急求醫，無奈向三、四間牙科診所敲門，竟然無位，其後四出敲門才「攝位」成功。佢話由於牙科生額多年來未有增多，現時市場上至少欠缺一百名牙醫，促請當局增加學額至每年收生六十至七十人。
咪睇小護牙的重要性，Sigmund話，港人普遍懶刷牙，估計有八成人有唔同程度嘅牙周病，可惜部分人以為係牙齒敏感，自行買抗敏感牙膏用，因而延誤治療，到牙齒鬆脫時已是太遲。所以佢提醒港人要有早晚擦牙習慣，尤其係臨瞓前，必須清潔口腔的食物殘渣，仲要記得每年洗一次牙。