政情：毛范議員獨癮深 泛民唔撐當幫忙
企硬本土主義嘅立法會議員范國威（Gary）尋日趁立法會第三日續會動議「年度」議案，要求政府制訂政策時需以「港人優先」為依歸，可惜呢項動議不但按慣例被建制派圍剿狂批企圖搞港獨兼法西斯主義，泛民主派亦幫理不幫親，唔撐當幫忙；政府更冷淡對待，搵副局長充撐場面算數，Gary被冷水兜頭淋，認真失威。
Gary提出十大建議，包括要求政府取消「雙非」居港權、收回內地單程證審批權、檢討中小學「普教中」政策、為個人遊數目「封頂」，甚至東江水供量收費等。多項建議橫跨多個決策局，但係政府一於好少理，只係派出教育局副局長楊潤雄頂替又跟團考察嘅局長吳克儉充撐場面，包辦多個決策局嘅行貨回應。
被轟「着同一條褲」
政府「冷處理」Gary，建制派議員為求曝光，繼續不惜工本對準Gary同提出修正案嘅毛孟靜（阿毛）開火。鍾樹根鬧爆建議係名副其實嘅「爆陰毒」嘅法西斯主義，不但體現唔到港人優先，仲激化中港兩地矛盾。樹根仲質疑Gary既然誓死保衞廣東話，以圍頭話質問Gary作為新界議員，又曉唔曉當地方言呢？向來字字珠璣嘅王國興就狠狠批評包括Gary、阿毛等人着埋同一條「港獨」褲，港獨幽靈喺香港的上空徘徊陰魂不散。
「踩住弱勢社群上」
建制派炮轟Gary唔係新聞，但所謂「同路人」嘅泛民亦唔係個個支持，劉慧卿不點名批評Gary「踩住啲弱勢社群上」係社會恥辱，認為問題源於政府政策。葉建源亦都話，北區學額緊張源於政府規劃不善，冇掌握將會來港就學學生嘅數據而落得如此下場。一場「辯論」拖拉四小時仍然未有結果，下周三再續。
其實當初Gary同阿毛所屬嘅香港本土去年已提出收回內地單程證審批權，表面睇好似冇乜嘢，但好衰唔衰佢哋講埋目的係「源頭減人」，惹來團體批評言論是歧視新移民，仲話向平等機會委員會投訴添。雖然兩人事後死撐話冇歧視，但佢哋啲見解發展到今日，建制同泛民都唔撐，甚至狠批，係咪應該檢討吓呢？