中環出更：大王天后教主大鬥髮
佔領行動一再衝擊香港法治核心價值，社會「護法」呼聲不絕於耳。早前卓妮出席一個慶祝酒會時，一眾商界名人都「護法」前「護法」後，但就係頭髮個「髮」。當晚同屬貪靚一族嘅「美容天后」曾裕（Joyce）同「美容教主」鄭明明分享「護髮」心得外，主人家「假髮大王」趙振國（CK）就特別戴咗一個度身訂造嘅假髮省招牌，仲透過社交網站上演剪假髮騷，認真夠創意。
曾裕愛「以假混真」
其實當日係CK為旗下髮品廠五十周年慶祝酒會，好多美容業界代表都有出席。平時以高貴嘅紮髮形象示人嘅Joyce就以直髮造型現身，唔講仲以為佢戴咗假髮。Joyce笑笑口話，佢一向鍾意百變髮型，所以經常以假髮混上真髮大玩「魔髮」，例如暗藏一片假髮以增加髮量，以方便梳理出一個完美造型。
梳靚個頭就係禮貌
Joyce仲話，冇頭髮或髮質唔靚仲慘過膚質唔好，事關皮膚唔好可以用粉底遮蓋，但係頭髮就好難搞。佢自爆以前髮質唔好，經常長到咁上下就唔再生長，後來經過悉心呵護打理先至有好轉。
同CK識於微時嘅鄭明明亦有現身，佢戴咗六十年代時興嘅短卷假髮增添氣氛。明明姐對護髮好着緊，經常佩戴假髮，有時留少少陰，有時駁馬尾，總之將真假髮玩到出神入化，唔講外人都睇唔出。佢笑稱，朋友都知佢好貪靚，永遠係頭髮第一，每朝起身第一件事就係梳個靚髮型，唔靚就寧願唔出門，事關梳個靚頭見人係禮貌喎。
卓妮