雙黃線全日泊 警執法不力
「大大個牌寫住全日唔畀泊車，仲劃埋雙黃線都冇人理，差唔多每日任何時間都有人喺度泊車！」關小姐指旺角砵蘭街近山東街位置全日均禁止車輛停泊，惟每次途經上址均發現多架車輛無視法例停泊，卻未見警方執法，「佢違泊你又唔理佢，咁同變相畀佢免費泊車冇分別！」
年發千五張告票 情況冇改善
警方發言人證實，接獲轉介後曾於四日內派員在不同時段巡視上址，並向違例車輛發出四十張定額罰款告票。發言人強調，一直關注區內交通問題，過去一年曾向違例車輛發出逾一千五百張定額罰款告票。不過，關小姐卻質疑定額罰款告票未能對違法者產生阻嚇力，「一年成千幾張罰款，但情況一啲改善都冇，咁警方係咪要諗諗計呢？」關小姐又要求當局提高罰則及加強執法，以確保道路暢通無阻塞，「警方查多啲，咁佢哋先唔會有僥倖嘅心態諗住冇人捉。」