遊樂場保安亭 電話打唔通
阮小姐早前於大埔梅樹坑遊樂場跑步時拾得一個錢包，即時前往遊樂場保安亭擬將錢包交給保安員，惟亭內保安員疑外出巡邏，遂按通告上的電話號碼通知職員，可惜電話一直無法接通，「我打咗起碼五次，第一次長響跟住變咗傳真聲，之後直頭唔通，過多陣再打又重複係咁！」
已改為場地經理電話
康文署發言人表示，為方便市民聯絡職員，遊樂場內不同位置皆設有三個告示牌，以提供場地經理及1823熱線號碼，當保安員外出巡邏時，保安亭會張貼遊樂場辦公室直線電話，而該電話同為傳真號碼。由於駐場職員亦需於外出巡察場地，以致偶爾會發生無人接聽電話情況，為免同類事件再次發生，已將保安亭告示牌的聯絡資料改為場地經理電話及1823熱線。
「明知啲人巡邏冇人聽電話就唔好放呢個電話啦，同埋1823熱線都唔係成日通，今次就話執到銀包啫，下次有人跌親搵唔到人幫咁點算？」阮小姐要求康文署需確定電話有人接聽，以免市民遇有緊急事故無法聯絡職員求助。