開講有話，冇咁大個頭唔好戴咁大頂帽，同樣道理，冇咁大塊地唔好種咁大棵樹。可惜吖，港產官僚做嘢求求其其，是是但但，種樹亂點鴛鴦譜，搞到種完又殺，殺完又種，沒完沒了，問你服未。
嗱，香港地通街危樹病樹就係人都知，但天水圍八棵冇即時倒塌危險嘅樟樹最近同樣被連根拔起，點解會咁？樹木專家係咁講嘅，樟樹需要大面積種植，並配合泥土同充足水分，依家先天不足，將來都唔慌健康得去邊。最好笑嘅係，呢個咁低級嘅錯誤，當局竟然連犯兩次，新種嘅錦葉欖仁同樣需要寬闊嘅種植空間，專家擔心會導致樹木生長減慢甚至「英年早逝」，好可能五、六年就要換過另外一批，啲公帑就係咁掟落鹹水海嘞。
正所謂，嘢唔可以亂食，樹木唔可以亂種，否則後果可大可小，絕對唔止浪費公帑咁簡單。呢，九龍塘海棠路試過有一棵石栗因為受白蟻侵蝕，加上不敵颱風而倒塌，砸穿一部的士，後來當局喺同一位置種過另一棵石栗，係就係生長得好健康，但枝繁葉茂亦帶來唔少問題，人車、人樹爭路不特止，部分根部更加逼爆行人路石磚，造成路陷，真係睇見都牙煙。咁都未算，有康文署前線員工代表踢爆，早就有研究發現石栗屬促癌植物，人類長期吸入其花粉，會增加患癌風險，署方內部亦有指引避免種植。你話嘞，官僚護樹變殺樹，綠化變播癌，唔係靠害又係乜？
講開又講，管理樹木並唔係冇辦法，睇吓官僚有冇心做嘢嘅啫。正如有學者話齋，訂立樹木法可以提供清晰指引，特別係唔同地方適合嘅樹木尺寸、生長環境同品種，避免再發生「樹根錯種」嘅情況。可惜吖，塌樹殺人悲劇不斷，當局對於立法訴求一直玩拖字訣，簡直見到棺材都唔流淚吖。
不過唔奇吖，港產官僚冇嘢叻，最叻麻木不仁，最叻扯皮卸膊嘞。嗱，審計署報告早前揭露，樹木辦普查後發現喺全港路邊有七萬棵「無王管」樹木裏面，一千三百棵有問題，結果搞成三個月都唔知邊個部門孭飛。鬼咩，三個和尚冇水食，家陣有八個政府部門負責日常樹木管理工作，有啲更加係同一地帶分屬唔同部門負責，有起事上嚟，仲唔你推我讓個個龜縮咩﹗仲有吖，當局調配人手同種樹一樣，都係亂點鴛鴦譜，有管樹經驗嘅員工往往被調做康體工作，負責康體嘅又被派去管樹，唔亂象叢生至奇喇。
見微知著，港府連棵樹都唔識種，旨意佢哋解決深層次矛盾，蚊都瞓蛇都死啦。計功夫茶話齋，亂咁砍樹就話好大機會錯殺無辜啫，之但係砍庸官懶官咯喎，隨便郁一件，雖不中亦不遠矣！