「雙學」宣布圍堵政總的升級行動，未夠二十小時就一鋪清袋，宣布失敗！
提早佔中一錯在先，「雙學」不但沒有吸取教訓，更是一股熱血上腦，把行動升級，從這刻開始，整個雨傘運動已徹底變質變味，錯判形勢，盲目把示威者推向火堆，一場流血騷動，「雙學」難辭其咎。
佔領行動逾兩個月，「雙學」完全無視民怨沸騰，罔顧大多數市民嘅聲音；老朽大早已指出，佔領運動令香港一夜沉淪，而佔領運動到頭來亦必如老鼠鑽牛角──難找出路！「某程度」來說是作繭自縛。
道理其實好簡單，你哋有嘅是青春，有書可以唔讀，有學可以唔返，之不過，社會大眾，尤其是靠揸車搵食嘅，你哋霸住人家嘅生計之路，「阻人搵食，罪大惡極」，唔嬲就全部變聖人喇！再講，「損人不利己，無良好抵死」，係都唔肯還路於民，無視法紀，係都要摧毀香港呢個「福地」，香港是我家，偏要玩謝她，咁嘅心態，會有運行嗎？
當年，孫文（孫中山）推翻滿清，建立民主共和的中華民國，被推為臨時大總統，其「就職誓詞」亦只用了八十一個字，其中最重要的是「圖謀民生幸福」以及「國內無變亂，民國卓立於世界；為列邦公認」呢二十三個字！
孫中山之所以偉大，其「革命」亦不可以無視民生幸福；如今，一個「雨傘運動」，卻搞到香港烏煙瘴氣，打殘零售業，危害經濟民生，如此「運動」，不正如盲人騎蠻牛，亂闖瓷器店嗎？
好嘞！家陣香港成功轉型，變成一個暴烈嘅政治城市，日日見到警察同啲示威人群追逐驅趕，旺角夜夜上演牛鬼蛇神鳩嗚怪鳴，如此神經荒誕卓立於世界，咁搞法，睇怕有求必應嘅黃大仙都話怕怕要移民。