位於機鐵九龍站上蓋嘅圓方商場除咗係藝人拍拖勝地外，原來仲係公務員泊車嘅新竇。話說受佔領行動影響，平日駕車返工嘅公務員唔少都被迫放棄開車，改搭公共交通工具返政府總部，對於居住港島嘅公務員尚算方便，但遠在新界嘅同事要日日坐個幾鐘車返工就比較麻煩啲嘞。部分公務員就諗到新招，索性駕車到圓方、轉一程機鐵到香港站再步行返政總，既方便又快捷。
公務員返工變招層出不窮，而佢哋鍾情圓方泊車唔係無原因，雖然要自費泊車，但停車場時租唔貴，閒日返工時間泊車冇人爭，慳番兩程西隧收費之餘，轉機鐵亦更掌握返工時間，無懼受塞車影響而遲到。講到尾，公務員萬水千山返工除咗服務市民，都係為咗份糧啫，但公務員加薪動議受立法會財務委員會「拉布」影響，遲遲未有好消息，仲嬲過佔領人士塞住條路阻返工，真係佛都有火。