政情：監警大換班 新瓶舊酒
自佔領行動爆發後，獨立監察警方處理投訴委員會（監警會）主席郭琳廣同個別委員嘅表現備受外界質疑。監警會新一年將會大換班，做夠六年副主席嘅立法會議員林大輝同地產及建造界議員石禮謙（大舊石）將會同時卸任，換上同屬議員嘅建築、測量及都市規劃界謝偉銓（Tony）同金融服務界張華峰。由於佢哋形象相似，似乎係「換湯不換藥」，加上最受爭議嘅委員早前已接獲口頭續任通知，睇嚟換班未必能夠增強公眾對監警會嘅信心。
人選倒模一樣
擔任政府公職一直有不成文嘅「六六規定」，即同一個人唔可以擔任同一公職工作超過六年，以及唔可以同時出任超過六項公職。按照慣例，監警會副主席由立法會議員出任，所以早在○九年，當局就委任衞生服務界李國麟、大輝同大舊石三人出任監警會副主席，每屆任期兩年。李國麟嘅任期喺前年屆滿，當局於是搵咗保險界陳健波取代李國麟個位。事隔兩年後，大輝同大舊石因為做夠鐘而要「起身」。
據聞由於大輝當年係以「散人」形式獲得委任，而大舊石係因為「專業會議」而被委任，所以監警會喺物色新一屆副主席人選時，都以「散人」同商界政黨為大前提，最後分別搵咗「六散人」之一嘅Tony，以及同大舊石一樣屬經民聯嘅張華峰出任副主席一職。不過，由於兩人都係建制派，估計接任後都只係「換湯不換藥」。Tony接受查詢時唔肯回應委任消息係咪屬實，只係話現任副主席任期尚未屆滿，一切有待有關當局公布。
再睇番現任委員，港大法律系首席講師張達明同前社聯行政總裁方敏生都夠鐘卸任，估計為免引起外界不滿，當局都會搵番有類似背景嘅人士接手。至於曾惹爭議嘅現任委員梁繼昌（Kenneth）同黃碧雲，雖然佢哋早喺八月底前接獲通知續任兩年，但由於近期被反佔中人士質疑佢哋喺處理警察投訴時立場偏頗，Kenneth尋日就自爆擔心政府突然唔同佢續約添！究竟當局點樣整頓監警會，相信好快就自有分曉。