中環出更：辭理大副校 楊偉雄做硬局長？
立法會已通過成立創新及科技局（創科局），但仍有待財務委員會通過撥款。盛傳係創科局局長大熱人選嘅理工大學副校長楊偉雄，之前一直未有正面回應去留問題，點知尋日傳出佢已經辭去理大副校長嘅消息，校方亦證實佢會喺明年二月約滿後離開大學。唔通佢咁有信心，創科局可以喺泛民主派「拉布」下仍可以順利通過撥款，所以坐定粒六唔續約？
創科局申撥款面臨拉布
楊偉雄係創科局局長大熱人選呢個消息已經傳咗兩、三年，佢喺公開場合亦多次被問到會否加入政府，但一直都冇畀過明確答覆。理大尋日證實，楊偉雄「將於二零一五年二月二十八日合約期滿後離開大學，尋求其個人及事業發展」，至於懸空嘅職位，將會透過全球公開招聘填補。我哋曾經致電楊偉雄求證，但佢以開會為由匆匆掛線。
創科局喺商務及經濟發展局全力推動，十月底時成功通過，之後就會交由財委會審議開局撥款申請。不過，多名泛民議員早前已經張揚話會「拉布」，再加埋最近發起嘅議會不合作運動，創科局幾時可以埋班，實在好難講。楊偉雄喺呢個時候毅然決定唔續任副校長一職，如果創科局撥款未能通過，恐怕佢明年三月起就要面對失業問題喇！
卓妮