中環出更：莫言話當年 初訪中大好恐懼
近期有唔少學位頒授典禮相繼舉行，尋日輪到香港中文大學（中大），其中最矚目係一二年諾貝爾文學獎得獎作家莫言，獲頒授榮譽文學博士學位。卓妮見佢喺台上致詞時，回想起當年第一次來港經歷，非常感慨。佢直言該次經歷令佢大開眼界之餘，仲造成思想衝擊，事關「在大陸，要排隊搶物資，在香港，商戶卻要求人來買」，令佢見識到資本主義同社會主義嘅分別喎！
出身於農村嘅莫言，年少時經歷過勞動同飢餓煎熬。
「發現物資可以過剩」
直到多年前，佢嚟到香港嘅中大翻譯研究中心做學術研究，擴闊咗佢嘅世界視野，見到香港到處都係高樓大廈及商場時，先第一次發現原來物資可以過剩。莫言仲特別提到，當時有位外籍朋友邀請佢去食飯，「早上五點宰殺了一隻雞，到晚上十點都未煮好，這段時間夠我寫好一萬五千字短篇小說。」經歷嗰次香港之行後，佢就覺得原來外國人係咁認真又有耐性，對佢後來嘅寫作方面亦有所啟發，認為要淆湯咁淆出小說，寫出生活嘅精華。
再臨已無語言障礙
提到同中大嘅淵源，莫言笑話第一次去中大時充滿恐懼，因為身邊所有人都唔識講普通話，但第二次嚟嘅時候就已經無呢個障礙喇，今次第三次到中大，仲成為中大一分子添，感受很深。
中大尋日同時向南豐集團主席及董事長陳慧慧、中國著名建築師王澍及作曲家顧嘉煇頒授榮譽社會科學博士學位；美國麻省理工學院斯隆管理學院金融學講座教授Robert C. Merton、中國工程院院長周濟頒授榮譽理學博士學位，並向中大前校長劉遵義頒授榮譽法學博士學位，表揚及鼓勵佢哋對社會各方面嘅成就同貢獻。
卓妮