俗語話，人衰行路打倒褪，飲水一樣會塞牙。家陣香港就係咁樣，諸事不順，樣樣阻滯。就講大型基建吖，延誤超支噩夢不絕，本來係推動社會發展嘅火車頭，今日變成燃燒公帑嘅無底洞，能唔能夠幫助經濟民生唔知道，不過幫納稅人倒米就肯定嘞。
點解基建工程會出現連鎖式延誤及超支問題呢？原因當然好多啦，包括承建商失職、港府無能監管不力、政客無良拉布阻撓等等，但歸根究柢，最大禍根始終係規劃失當，強行上馬，所以種下今日嘅惡果。嗱，唔係山草藥噏得就噏o架，有關注團體分析過十一個正在進行、已撥款及規劃中嘅大型基建時間表，並調查得到各份工程合約嘅中標公司及金額，發現多間大型建築公司同時包攬多個項目合約，證實工程時間重疊係項目超支嘅主要元兇。調查同時發現，明年將會進入工程高峰期，有近十個工程同時進行，而造價方面，十一個工程現時合共近四千億元，比第一次向立法會申請撥款時已經超支逾六百億元，你話係咪等如倒錢落海吖？
其實，基建工程萬箭齊發，勢必推高建築成本，呢個道理連細路仔都知喇，偏偏港產官僚唔知，或者知而不理，盲目推行基建工程大躍進，自埋超支地雷，簡直匪夷所思。可圈可點嘅係，呢十一項大型基建，包括中九龍幹線、中環灣仔繞道以及「五線齊發、五線齊塌」嘅港鐵五條新支線等，都係前朝政府嘅產物，亦即係前特首曾蔭權爵士好大喜功嘅傑作，家陣嚴重超支醜聞不絕，套用近期嘅政圈潮語，即係「貪曾請客，市民埋單」，簡直就係靠害呀！
嗱嗱嗱，咪話功夫茶以君子之心度小人之腹，基建規劃失當搞到建築成本上升，貪曾未必係被虛榮沖昏頭腦o架，反而隨時係精心計算嘅結果。係人都知，貪曾當年打算推出慳電膽現金券，結果被踢爆涉嫌以曲線手法益親家，家陣港府工程一窩蜂推高建築物料價格，話唔定供應商中有唔少「曾朋友」，廉署查貪曾時不妨順藤摸瓜追查一下，分分鐘為本港廉政立下奇功o架。
所以話，做香港人真係好鬼閉翳o架。佔領街頭搞到滿城風雨，沒完沒了；而嚴重超支問題全面佔領港府基建藍圖，一樣噩夢不絕，鬧劇唔知會上演到何年何月。唔好忘記，超支六百億元只係現階段嘅咋，以港府嘅無能、政客嘅無良，大型基建寸步難行，最終埋單要幾多錢，根本無人知道。
一句講晒喇，工程超支無底洞，都係貪曾惹嘅禍。佔領搞到天怒人怨，佔中三子揚言自首，貪曾對香港嘅禍害絕對不低於佔中鬧劇，唔知佢幾時至肯自動投案呢？