立法會財務委員會今年年中審議新界東北發展前期工程撥款申請期間，爆發示威者衝擊立法會事件，當時議員黃毓民離開立法會大樓停車場時，就懷疑被立法會保安主任攔截。行政管理委員會（行管會）尋日開會討論事件，仲決定要就事件撰寫報告，有關報告料會喺今個月完成。
妨礙立法會議員進出立法會大樓係有機會觸犯《立法會（權力及特權）條例》，毓民早前就懷疑被立法會保安主任攔截事件去信行管會投訴並要求跟進，行管會亦都有開會討論。有議員透露，毓民一度揚言要報警處理，但有議員就建議不如先要求秘書處撰寫報告。
據了解，秘書處對事件不敢怠慢，已經決定就事件撰寫報告喇，希望可以喺今個月之內完成報告咁話。我哋都有聯絡過毓民，想查詢事件嘅進展，但佢未有回覆。