政情：圍插袋巾助長拉布
隨着泛民主派立法會議員「冧友」加入工務小組委員會，奪得該會主導權後，建制派十二名議員「跪求」補飛加入，但被新任主席梁家傑（袋巾傑）同一眾泛民議員「拉布」玩殘。委員會尋日再次召開特別會議討論逾期加入申請，建制派議員鍾樹根鬧爆袋巾傑外，蔣麗芸（Ann）亦不滿會議議而不決，好「娘娘腔」，噴到袋巾傑一面都係。正因為建制派議員沉唔住氣，變相助長泛民「拉布」，結果兩小時會議乜都冇做過。
Ann蔣爆雞腸
會議甫開始，袋巾傑已經同泛民議員你一言我一語，就十二人嘅逾期加入申請分拆多個表決方案，包括首先處理謝偉俊嘅申請、暫不處理其餘十一人申請、要求欲補位嘅議員旁聽會議三次先獲准加入，亦有議員要求立即付諸表決。幾個方案未討論已經玩到大家陀陀擰，阿Ann隨即大動肝火，狠批立法會議而不決、決而不行，行而不果好sissy（娘娘腔），又鬧爆泛民唔好拖拖拉拉，要爽爽快快表決。
樹根搬諺語
樹根亦接力開火，以標準諺語瞄準袋巾傑：「未登天子位，先置殺人刀」，向建制派開刀，「畀你做大會主席咪死得人多，畀你做特首香港咪玩完？」樹根又自稱會盡力畀議員加入委員會，更疑似爆粗話：「Ｘ，你就唔係，一拖再拖，拖三四次……」要求立即表決。樹根事後否認爆粗，當時只係話：「掉返轉你就唔係」。
不過，要成功「拉布」，單靠泛民力量係唔夠嘅，會議踏入最後十五分鐘，正當大家準備表決係咪贊成謝偉俊加入委員會之際，葉國謙竟然因為長毛質疑佢「私相授受」而要求聽會議錄音，其他泛民議員紛紛乘機抽水和議，好彩葉醒覺冇再追究。不過，呢場鬧劇已經拖到要休會待續，睇怕呢場持久戰唔玩到明年都唔心息。其實早前已有建制派議員建議架空小組委員會，將逾期加入申請直接交由財務委員會表決通過，如果係咁做，仲同泛民玩咩呢？