中環出更：聖誕外遊各有理由
臨近聖誕假期，又係旅遊旺季，唔少人已經計劃好放假出外玩番轉，加上日圓持續下跌，日本自然成為唔少港人嘅外遊首選。不過，卓妮日前在沙田馬場見到馬會大董之一嘅創興銀行副主席兼董事總經理梁高美懿（Margaret），佢話聖誕節都有計劃去旅行，但就表明唔會去日本喎。
日圓一跌再跌，年底嘅大阪、北海道及東京團一早爆滿。不過，日圓下跌就吸引唔到Margaret，唔知係咪仲擔心受輻射影響或唔太鍾意行街，佢話寧願約埋啲朋友去其他地方旅行，一齊做運動打波仲好喎，真係夠晒健康。
杜振源赴韓「搵食」
相反現代管理（飲食）專業協會主席黃永幟今年就已經去咗日本兩次，佢話嚟緊聖誕節仲會再去，但唔係公幹，純粹自己去玩。不過，旗下食肆就唔會考慮選用日本食材，一來佢哋以中餐為主，二來仍然怕有輻射，所以對食材來源地非常謹慎，確保食客安全。
此外，南韓亦係港人近年旅遊熱點，好似「快勞夾大王」國際文具集團主席兼行政總裁杜振源（Simon）咁，就唔使等到去聖誕，日前已同好友兼前高官葉澍堃（Stephen）孖住去首爾玩。Simon經營唔同國家菜式嘅食肆，對飲食非常講究，今次去韓國食足四日，莫非有意喺首爾搜羅有潛質嘅美食，然後喺香港開番間韓國餐廳？
卓妮