新界鄉議局明年會改選村代表、廿七個鄉事委員會及鄉議局領導層，呢場新界人大混戰，外界實在難以睇得通透。據知鄉議局主席劉皇發（發叔）明年將強勢回歸重奪何君堯（Junius）手上嘅屯門鄉委會主席之位。Junius得悉大勢已去，據聞四出向有關方面「叩門」參與屯門區議會直選，叫做攞番個「安慰獎」，更有傳佢率先劍指身兼立法會議員嘅何俊仁（AV仁）嘅區議會議席。
其實Junius有意狙擊AV仁絕非空穴來風，佢上周就以「保衞中環」運動召集人身份帶隊到AV仁嘅屯門辦事處踩場，抗議AV仁身為律師帶頭違反法庭就佔領行動頒下嘅禁制令。
另一說法係Junius轉向挑戰身兼屯門鄉委會首副主席嘅陶錫源，事關陶過去幾屆區議會選舉均自動當選，有機會可落場一試身手。
我哋就鄉紳倒「堯」、延續「皇」朝之事問過Junius，佢神態自若回應稱「睇吓點！」又話新界鄉紳一向都係「獨特地傳統」，但世事冇絕對，發叔參選都係好事，但佢個人就未有具體參選計劃喎。