政情：今日你上鏡：佔鐘「最後一擊」 阿柱留影

立法會社福界議員張國柱（阿柱）喺十月底證實患上惡性胃黏膜淋巴瘤，事後向立法會請咗兩個月假接受治療同休養。尋日阿柱單獨現身金鐘海富天橋，表示最近個多月好少喺金鐘出現，知道尋晚有可能係佔領行動「最後一擊」，所以就特登帶埋自己部私伙相機去影相留念，記低眼前一刻。講番最新近況，阿柱透露上周五做完第一次電療，睇吓腫瘤可以縮細幾多，至於胃口方面就冇乜影響，現時飲食尚算正常，所以體重並冇好大變化。