政情：周永康甩底辣慶葉劉
佔領行動持續超過六十日，學聯代表於十月下旬曾同港府代表對話，雙方會後分歧未見收窄，自此對話一直束之高閣。不過原來有中間人一直居中「拉線」，其中一人就係行政會議成員葉劉淑儀，佢公開爆料指一度希望促成數名中產選民同學聯正副秘書長周永康同岑敖暉等人會面，但最終周永康等人唔見蹤影，加上周永康有成日遲到嘅前科，質疑佢未入社會做過事唔識妥協喎。
累人白等個幾鐘
葉太尋日出席電視台訪問節目時，大爆學聯中人鮮為人知一面。佢首先透露，有七十名中產選民曾要求佢幫手約學聯代表見面，起初見面地點係旺角，之後改到中環，最後約定於金鐘添馬公園。最終中產選民有數人赴會，之不過等咗個幾鐘，等到落大雨，都唔見周永康同岑敖暉二人。佢同時聽聞周永康等人成日遲到，質疑佢組織唔到自己，唔識同人妥協，舉例指周永康遲到，至少會遲到一個小時。
葉太其後主動出擊反駁「雙學」爭取真普選、無篩選等口號，指只要心平氣和去傾就知係無理據，又話好多上街青年人，追求真普選係人云亦云，因一旦即場問及真普選嘅定義，佢猜想未必會答得出，再三強調邊有選舉係無篩選喎。
葉稱唔擔心暴動
講到依家佔領行動，有前高官更預言未來兩年或出現暴動，葉太表示對此唔係好擔心，但承認佔領行動依家好大規模、前所未見，加上有執達主任被包圍等情況先後出現，強調未來兩年有兩場大型選舉，即使係支持定反對佔中，希望選民用選票呢個機制表達意見，然後接受結果，唔好再去搞各種群眾行為去逼政府做一些事情。
對於佔領行動衍生嘅青年問題，佢認為涉及物資同非物資兩個層次，亦有青年為咗追求公義，強調依家人心浮動，純派錢唔可以根治問題，最重要係脫貧同做好社會經濟結構改革工作喎。