中環出更：議員變質 李秀恒拒從政
中華廠商聯合會換屆選舉塵埃落定，由現任第二副會長李秀恒（Eddy）當選新任會長，有傳Eddy志不只於此，於一六年立法會選舉時可能再下一城爭奪廠商會議席。不過，Eddy尋日接受電台訪問時，談到從政時耍手擰頭，自言唔係參加選舉嘅合適人選，又話依家議員尊貴身份不再，批評唔少政客為政治而做政治，因此佢寧願收工後早啲回家，錫女兒一啖喎。
稱港仍有營商「錢途」
做鐘錶出身嘅Eddy，其後又提到廠商最關注嘅營商環境，形容香港仍有「錢途」，最有潛質轉型成批發中心，例如喺長沙灣每日舉行時裝表演、喺紅磡設立珠寶博物館，又可以考慮將黃竹坑發展成香港家品設計中心，或將觀塘變身禮品批發中心，認真諗頭多多。
講番廠商會換屆選舉點滴，Eddy透露爸爸今年七月因病去世，心情跌至谷底，曾猶豫應否替爸爸風光大葬，但最後決定收拾心情競逐會長選舉。佢又憶述，爸爸早年返到家鄉清遠時，曾有領導為佢開車門，令爸爸感到又開心又意外。
卓妮