政情：今日你上鏡：伍婉婷「放鬆佔區」

佔領行動持續咗兩個月，社會氣氛緊張。灣仔區議員伍婉婷（Yolanda）尋日就喺其銅鑼灣選區，與一眾街坊喺位於佔領區隔籬嘅百德新街街頭大玩Art Jamming。話說活動係由區議會同民間團體合辦，大會準備咗六幅十八呎長嘅大型畫布，由民間團體邀請藝術家先勾勒好框架，再由大小朋友自行填色加以創作。Yolanda話，佢以前都喺辦事處搞過類似活動，今次再搬出街頭，大家都玩得好開心。佢又話，希望透過創新嘅街頭活動可以令大家放鬆啲，冇咁大壓力。