政情：泛民累港成「瘀血社會」
立法會財務委員會審議俗稱「三堆一爐」嘅撥款申請，但被一班泛民主派議員「拉布」拉咗成個幾月，一項撥款都未表決，搞到天文台前台長林超英（黑英）都忍唔住出聲叫停，擔心長此下去遲早令香港變為「瘀血社會」。另一邊廂，可持續發展委員會主席陳智思（Bernard）亦話三個堆填區快將爆滿，但焚化爐都仲未起，形容垃圾問題已「死到臨頭」。兩人一唱一和，無非都係想立法會快啲通過「三堆一爐」撥款啫！
「選民要幫手通通佢」
黑英尋日出席電視台節目時話，對現時立法會慣性「拉布」嘅情況感到好可惜，認為議員職責係議決事項，一係通過、一係否決，等社會好似血咁可以繼續流動，「否則啲血唔流通就會瘀」，擔心議員再係咁「拉布」落去，遲早搞到香港變為「瘀血社會」喎。其實黑英已經講得好厚道，香港血液唔流通都皆因立法會內太多「瘀血」塞住，先至令撥款唔通過，未來兩年選舉，選民係時候幫手通吓佢喇。
咁啱得咁蹺，Bernard尋日接受電台訪問時，原本講緊下月交畀環境局嘅垃圾徵費報告內容，但喺開場白都忍唔住評價財委會審議「三堆一爐」嘅情況。佢話，擴建堆填區同興建焚化爐討論咗好多年，可能當時大家覺得垃圾問題仲未「死到臨頭」，但拖到今時今日，三個堆填區喺五、六年就會爆滿，焚化爐都仲未起，垃圾問題迫在眉睫，所以依家要先做好源頭減廢。
Bernard話，委員會建議政府以「按戶隨袋徵費」作為大方向，估計三人家庭每月垃圾費約要三十至四十四元，但係港府會設三年過渡期，畀未準備好嘅住戶可以攤分整幢大廈嘅垃圾費先。政府會爭取喺立法會換屆之前實施，但依家立法會慣性「拉布」，垃圾徵費又會否成為翻版「三堆一爐」？Bernard坦言，「拉布」或會造成阻力，但重申垃圾徵費係要減少製造垃圾，唔係增加庫房收入，實施一年後會檢討，希望市民「行住先」喎。