政情：中環出更：黎穎瑜靠獎學金「探索世界」
勞工及福利局政治助理黎穎瑜（Jade）唔經唔覺已經入咗政府呢個「熱廚房」一年，雖然曝光率未見突出，但亦不時落區出席講座同年輕人交流。Jade尋日出席九龍城書節開幕講座分享個人奮鬥史時，就首次自爆七七年喺廣州出世，五歲先隨家人來港定居，仲話來港後，先發現原來杧果係黃色嘅！
家境窮 五歲始知杧果黃色
Jade提及自己並非「富二代」出身，自小都係讀街坊學校，但就參加好多大大小小嘅公開比賽、攞咗唔少獎。直至中五，佢明白家境關係，想出國留學探索呢個世界，唯一辦法就係申請獎學金，最後成功申請並轉讀香港李寶椿聯合世界書院，畢業後升讀中文大學，其後再攞獎學金去牛津大學攻讀碩士。
講到呢度，Jade坦言呢一切成就都係靠自己努力得來，更自爆五歲來港定居時先知道杧果原來係黃色嘅，因為細個喺內地食親嘅杧果都係撞瘀晒、灰灰黑黑咁，藉個人奮鬥經歷勉勵時下年輕人都可以靠自己向上流動。
卓妮