政情:中環出更:茂波夫婦 笑住入高院

早前捲入誹謗訴訟嘅發展局局長陳茂波(Paul)夫婦,尋日再次步入高等法院,但二人全程不但笑逐顏開,仲同親友滿場飛合照添!原來「波兒」陳天行(James)尋日喺高院正式獲委任為執業律師,未婚妻亦有現身捧場。Paul更透露兒子年底就做「老襯」,據知未婚妻係James喺牛津大學嘅同學,可謂雙喜臨門。

「波兒」獲委任律師

正式成為律師嘅James就讀牛津大學埃克塞特學院(Exeter College)法律系,回港後喺港大法律學院修讀法學專業證書課程(PCLL),現正喺全球知名嘅富而德律師事務所工作。無獨有偶,康泰旅行社董事長黃士心孻女康莉(Connie),尋日亦獲法庭接納成為執業律師,同James更係港大嘅同班同學添!

基層出身、未曾出國留學嘅Paul眼見兒子成材不禁感動到眼紅紅,但就話兒子只係展開人生一個新階段,寄語要做對社會有貢獻的事,可以自立搵到食就得喇。

Paul又話,事業上會任由兒子自由發揮,唔會特別力薦佢加入政府或律政司工作。至於會否就誹謗案上訴,Paul就話暫時未決定。咁佢兒子又會否接手案件呢?James即時閘住,自稱資歷尚淺,唔會考慮喇。

黃士心孻女亦如願

除咗Paul,笑到見牙唔見眼嘅仲有黃士心,原來佢個孻女康莉(Connie)同James不但係PCLL嘅同學,尋日亦一同獲委任為執業律師。

黃士心話,三個仔女都鍾意讀書,但希望仔女唔好畀自己咁大壓力。不過,佢依家三個仔女都長大成材,最冇壓力相信係佢自己喇!

卓妮

第一手消息請下載on.cc東網iPhone/iPad/Android/Windows Phone Apps