開講有話，冇咁大個頭，唔好戴咁大頂帽。港府成日話要將大專教育國際化，不斷增收外地學生，點知本地學位一直喺原地踏步，結果搞到學位嚴重不足，本地學生望門興嘆，怨聲載道。
呢，自從前朝政府將大學非本地生比例由百分之十增加到百分之二十，愈來愈多非本地學生報讀八大院校，淨係一三/一四學年就有一萬四千幾人，比對上一個學年增加百分之六點二。對於外地生搶學位嘅質疑，教育局局長吳克儉係咁講嘅，由於非本地生主要透過核准學額以外嘅超收機制獲得取錄，唔會對本地學生構成直接競爭。佢仲話，招收非本地生可以協助本地高等教育界更加多元，並加強本地學生以至香港整體競爭力喎。
嗱，呢啲咪叫巧言令色囉。係人都知，整體學位冇增加，個餅就係咁大，外地生分多啲，本地生自然被攤薄，點會冇直接競爭呀。再講，喺呢一萬四千幾個外地生裏面，內地生佔咗近八成，所謂「國際化」，其實只係「內地化」咋。最匪夷所思嘅係，近年屢屢揭發有非本地生以虛假學歷來港搶學位，淨係舊年就有四宗咁多，問你服未。正如教育界人士話齋，大學國際化主要目的係透過唔同國家嘅學生互相交流，擴闊視野，依家撞口撞面都係文化同習慣相近嘅「自己人」，根本同原意背道而馳。
即係咁，香港係高度開放嘅國際城市，廣納四方人才，本來無可厚非，之但係未能滿足本地學生需要就搞國際化，未學行先學走，唔撞板至奇喇。大家有眼見，大專學位僧多粥少嘅問題，咁多年來唔單止冇改善，反而愈來愈惡化，資助學額長期低於適齡人口兩成，莫講話遠遠低過歐美國家，同台灣高中生幾乎百分百入讀大學更加無得比。好似今年文憑試咁吖，二萬七千多名合資格升讀大學嘅學生，只有一萬四千幾人如願以償，其餘只能另尋出路。
點解本地大學愈來愈向外地生傾斜？咪因為港府好大喜功囉。至於讀唔到資助學位嘅本地生點算好？如想繼續升學，惟有選擇自資學位及副學位課程，最弊係院校自負盈虧，唯利是圖，加上港府冇監冇管，搞到副學位課程泥沙俱下，認受性低，讀完之後高不成低不就，兩頭唔到岸。
始終都係嗰句，教育係向上流動嘅階梯。今時今日，大部分年輕人入大學仲難過中六合彩，既睇唔到前途，又睇唔到希望，有咩辦法唔愈來愈激進，變晒街頭鬥士吖！