要泛民同建制派達成一致共識，好似難度好高，不過都唔係無可能，只要佢哋都係受害者就得。最近立法會大樓受到嚴重蠅患困擾，啲烏蠅拍極都仲有，好多議員向立法會秘書處反映問題，於是秘書處決定周日出動滅蟲部隊「清場」，無論天花板同地板都會噴殺蟲劑，誓要趕絕呢班不速之客。
近日唔少議員助理都忙於滅蠅，佢哋形容呢啲烏蠅細細隻，飛得唔快，但孳生速度極快，每次拍死一隻後好快就有第二隻出現，而且拍死後仲有奇怪汁液爆出，非常惡心。
曾經有訪客飲飲吓咖啡，點知就有兩隻烏蠅跌落咖啡「游水」，情況好嚴重。有人仲打算帶埋滅蚊器返工添！
立法會無故被烏蠅「佔領」，秘書處反應迅速，決定周日派人大規模滅蟲，近日已提醒大家唔好放食物喺枱面。至於點解咁多樓層都同時中招，係大樓內部有衞生問題，定係同立法會外佔領區衞生情況有關，就不得而知了。