政情：蕭偉強卡片「凸」顯細心

勞工及福利局副局長蕭偉強（Stephen）出任問責官員前，曾做過康復專員，當時經常接觸殘障人士，對於佢哋嘅訴求有一定了解，所以佢上任後都同勞福局局長張建宗一樣，印咗批中英文凸字嘅卡片，落區出席活動遇到視障人士時就派凸字卡片，等對方唔使對住張卡片一頭霧水。

Stephen話，佢平時落區同團體見面前，都會打聽吓團體入面有無視障人士，如果有嘅話就會袋番幾張凸字卡片。而為咗方便唔同國籍嘅視障人士，佢更加會準備定中英文凸字卡片。

講開勞福局，不得不提仍未獲立法會財務委員會通過低收入在職家庭津貼計劃（低津）嘅撥款申請。Stephen話，雖然低津可以幫到唔少低收入人士，但廢物處理問題亦係迫在眉睫，如果「三堆一爐」再唔通過，香港就會變成垃圾圍城，所以唔會要求財委會調動議程優先審議低津喎。