政情：張宇人自認「撳掣機器」
自由黨飲食界立法會議員張宇人（Tommy）自從做咗財委會主席，零舍意氣風發，尋日佢突然喺電台自爆話，自由黨其實無乜自由，自己好多時候都係跟黨立場投票，名副其實係「掣機器」喎。Tommy從政十幾年，竟然公開承認自己係「掣機器」。如果佢咁無奈，點解唔退黨算罷呢？
喜怒形於色 話唔啱從政
Tommy話自由黨無自由，因為唔少議題唔屬於自己負責，所以投票立場要跟隨黨嘅主張。佢又話自己唔適合從政，因為佢高唔高興都擺晒上塊面度，唔似得有啲人咁叻可以收埋晒喎！Tommy咁講又得罪人喇，係人都聽到句句有骨，擺明係寸緊某啲人啫！
講起自由黨，如無意外現任副主席方剛將於下月初正式接任黨魁，咁邊個代替方剛呢？Tommy一早表明無意做，黨內嘅選擇其實唔多，估計係時候畀生力軍出線喇！