政情：甩底議員 藉口好流

扶貧小組開會 七人冇影

扶貧小組委員會尋日朝早八點半開會，小組委員會共有二十二位成員，法定嘅開會人數係至少七位。點知包括小組委員會主席馮檢基在內，只有六位議員準時現身，其中四位為建制派，泛民兩人。連本身係小組委員會副主席嘅張超雄都冇出席，結果馮檢基惟有眼白白咁宣布流會。

原本答應會出席但最後甩底或者遲到嘅共有七位議員，除咗AV仁之外，泛民議員仲有李卓人、梁耀忠、郭家麒同梁國雄（長毛），建制派議員就有梁志祥同鄧家彪。據聞梁耀忠遲咗半小時，趕到時已經流咗會。日前喺旺角佔領區被拘捕嘅長毛，因為尋日朝早被押解咗去法院導致甩底。李卓人就話尋日朝早要開會，所以遲到，但問到開咩會，佢又係唔肯透露。至於身為小組委員會副主席嘅張超雄就去咗電台做直播節目，所以未能開會。對於搞到流會，佢就話要同公眾同參與會議嘅婦女組織道歉喎！

時間觀念差 要認衰仔

至於建制派方面，梁志祥就話，近日元朗有巴士路線重組，佢原本打算朝早七點幾喺元朗視察路線重組後街坊搭車嘅情況，然後再趕返立法會開會，估唔到遲咗十幾分鐘，返到去已經流會。不過點解佢早唔視察，晚唔視察，係都要尋日朝早去呢？講到呢度，大家係咪對議員的藉口感到厭倦呢？都係鄧家彪老實啲，佢坦白承認係自己「衰仔」，將時間調校得太緊迫，搞到趕唔切，所以要同市民講句對唔住咁話。