政情：中環出更：梁繼昌研標時 廿萬煲無米粥
政府正研究係咪實施標準工時，而會計界立法會議員梁繼昌（Kenneth）就豪花二十萬元，用咗半年時間研究專業會計師嘅工時狀況，同埋業界對立法規管標準工時及最高工時嘅睇法。結果顯示業界僱主唔贊成立法，怕增加經營成本，但打工仔就支持。Kenneth花咁多錢得咗個「阿媽係女人」嘅結果，名副其實係煲無米粥。
今次報告共收番近七百份問卷，結果八成半人每周加班一次，五成三人加班多過五小時，多過十一小時嘅都有三成，情況都幾嚴重。所以支持就標準工時同最高工時立法嘅受訪者高達七、八成，但有四成人覺得不可行，可見打工仔心情都幾矛盾。
Kenneth就話一早預咗有個咁嘅結果，佢仲以依家佔領者爭取嘅真普選為例，話民主政制個個都想要，但可能有啲人會選擇啃住先。佢又話，勞工及福利局局長張建宗、標準工時委員會主席梁智鴻已同佢索取研究結果，唔知業界嚴重超時工作嘅情況會唔會有改善？
卓妮