政情：中環出更：「仲」有愛妻助圓機師夢
通街嘅聖誕裝飾，提醒大家聖誕節就快到。願望成真基金（下稱基金）尋日趁此佳節前舉行「分享願望的喜樂」開幕禮，助患有重病嘅兒童達成願望。人人都有夢想，身兼基金主席嘅前高官馬時亨女婿劉仲恒（Kevin）笑言童年嘅願望係當飛機師，可惜太勤力讀書，結果搞到大近視，機師最終做唔成，但就做咗醫生。
雖然童年願望落空，但Kevin太太馬露明，就深明老公心意，兩年前帶Kevin去學駕駛直升機，畀佢一嘗沖上雲霄嘅滋味。Kevin現時經過激光矯視後，已經唔需要戴眼鏡，未來有機會可能學揸小型飛機添！愛妻咁貼心幫佢完成夢想，Kevin都好識做，揚言會努力學跳舞，打算兩年後結婚五周年時，同鍾意跳舞嘅太太舉辦派對共舞，真係甜到漏。
讀醫師承梁卓偉
卓妮見香港大學醫學院院長梁卓偉（Gabriel）中途趕至，原來Gabriel同Kevin係兩師徒，當年Kevin就讀大學一年級時，Gabriel剛回港執教鞭，由於兩人都曾喺加拿大生活，所以特別啱傾。Kevin更賣口乖話，獲良師啟發唔少。
香港總商會主席彭耀佳都有到場，講起聖誕節，佢話依家啲小朋友好醒目，加上資訊咁發達，佢嘅一對仔女三歲左右已知道聖誕老人只係扮出嚟，真正送禮物畀佢哋嘅係爸爸。佢話節日最緊要係一家人一齊，做咩都唔緊要，得閒攬吓太太同一對仔女已經好滿足。
卓妮