年尾快到，打工仔最關心嘅，除咗雙糧有冇着落，梗係明年人工加幾多喇。近排坊間有多個有關明年加薪嘅預測，多數都唔樂觀，又難怪嘅，佔中影響經濟表現，打工仔點可能唔受影響吖。
不過你咪理，市面一片淡風，唯獨佔中骨幹李卓人屬下嘅職工盟卻大唱反調，建議企業出年加薪百分之七，仲話佔領行動對本港經濟冇乜影響喎。即係咁，打工仔加人工梗係多多益善，工會叫價高啲係可以理解嘅，不過諗深一層，今次佔中職工盟醜聞不斷，李卓人更加係有口皆悲，家陣失驚無神講加薪，睇怕唔止「關心」打工仔咁簡單。
冇錯喇，淨係一句佔中影響經濟嘅講法「缺乏數據支持」，就將李卓人嘅狐狸尾巴暴露無遺。原來搞呢場大龍鳳，為工人爭取權益係假，為佢啲污糟邋遢嘢「洗底」至係真。可惜吖，佢一味死撐，結果只會愈洗愈黑，自暴其醜。係人都知，佔領行動持續近兩個月，嚴重打擊本港經濟，特別係零售、旅遊、酒店業，簡直冇啖好食。呢，銅鑼灣有間雪糕店，試業嗰陣每日營業額有近三萬蚊，點知正式開業撞正佔領行動，跌到得番四千蚊，直頭係欲哭無淚。旺角嘅商戶一樣咁慘，佔領區附近酒樓生意急跌三至四成，最多嘅跌九成。你話嘞，商戶生意一落千丈，想加人工都無能為力啦，有僱主更一度焗住要求員工九折出糧添。佔中搞到百業蕭條，打工仔多得佢哋唔少，李卓人同佢班「佔友」一邊破壞經濟，一邊要求加薪，神又係佢，鬼又係佢，簡直不知所謂！
老實講，覆巢之下無完卵，受運動影響嘅點止佔領區吖。港府早前因應形勢發展，將全年經濟增長下調至百分之二點二，咪就係「數據支持」囉。職工盟扮晒工人之友咁款，實情係工人之賊就真。
打工仔出年加薪幾多暫時冇人知，但李卓人反中亂港有功，策劃佔中得力，早就得到大老闆重重打賞嘞。嗱，李卓人至少有兩個老闆，一個係本港嘅淫賤黎，李卓人之前靜雞雞「袋住先」冇上交所屬政黨嘅一百五十萬元政治捐款，就係出自佢手；另一個老闆山姆大叔出手更加闊綽，美國民主基金會轄下機構多年來泵水達一千三百萬元之多，而且每次職工盟有「重大行動」，洋老闆仲提供額外經費，真係財源滾滾，豬籠入水。
一句講晒，天下冇免費嘅午餐，李卓人同職工盟收淫賤黎同美國人錢，又點會真心為香港打工仔利益着想吖，所謂要求企業明年加薪，只係借打工仔過橋撈取政治資本，進一步反中亂港咋。
點講都好喇，出得嚟行，遲早要還，李卓人收錢搞搞震，唔好話廉署查緊，被佔中搞到雞毛鴨血嘅打工仔都唔會放過佢啦。