政情：公民講場：茂波捱批 阿邱解圍

立法會鐵路事宜小組委員會尋日開會，討論包括沙中線工程嘅最新發展。期間有議員批評政府喺大型基建揮金如土，喺文物保育方面就做守財奴，又關注沙中線至少超支三十一億元。本來呢個議題係針對發展局，理應由局長陳茂波回應議員提問，但運輸及房屋局副局長邱誠武竟然行出嚟為陳茂波擋箭，佢否認政府喺大型基建揮金如土，又話政府對最終嘅保育方案態度中立。唔知下次講開運房局議題時，陳茂波會唔會幫番邱誠武解圍，還番個人情畀佢呢？