政情：張國鈞唔怕瘀 想搵企鵝助選
企鵝群居喺南極係常識，不過五年前公開指「北極人少企鵝多」，而被嘲笑為「企鵝男」嘅中西區區議員張國鈞，似乎唔覺得呢件事係「恥辱」，反而打算如果來日參選立法會，唔排除用企鵝助選喎！
話等多啲人對佢有印象
講到打選戰，知名度始終最緊要，就算係負面教材都冇所謂。一直喺地區服務嘅張國鈞，對區議會選舉信心十足，自認唔使用到企鵝做吉祥物呢一招。
不過一去到選區大啲嘅立法會選舉，形勢就唔同晒。曾經競逐過立法會議席嘅佢，最後都無緣躋身立法會，可能係知名度唔夠喇！唔知係咪因為咁，佢聲稱如果有需要，第日會將幾年前嘅「企鵝」事件拎返出來做宣傳，等多啲市民對佢有印象喎！為咗博出位而炒自己糗事冷飯，呢種精神都幾阿Q囉！