政情：建制無下文之「筵席」
佔領行動至今接近兩個月，暫時睇嚟仲未有完結迹象，因是之故，政府同立法會都取消或延遲咗好多活動。建制派人士就透露，自從佔領行動開始至今，建制派定期飯局呢件事就未有再提及過，有人認為係同出席率一向唔高、特首梁振英（CY）經常傾幾句就早走等有關。唔知飯局會唔會最終「唔講就唔存在」呢？
似乎唔多人有興趣
話說自從CY上台，建制派每隔一至兩個月就會埋首舉行飯局，不時邀請CY及高官傾吓最近政治形勢及社會關注議題等。據知飯局係由立法會議員譚耀宗同葉國謙負責統籌，以往通常都會去中華總商會飯堂，之後就改到中信大廈一間酒家，每名議員科水幾百蚊分擔。最近一次搞飯局已經係九月底，不過當時因為突然爆出佔領行動，惟有臨時取消，點知飯局就此銷聲匿迹。
我哋問咗幾個建制派議員，自由黨鍾國斌（Felix）就老實話「冇咗」飯局喇！其實睇番之前幾次，出席率都唔係咁高，最少人嗰次，唔計主席曾鈺成，四十二名建制派議員中只有十五人到，自由黨就試過一個人都冇，好多時CY傾咗幾句就走，睇得出大家對呢個聚會興趣有幾大。Felix仲話，反正建制派每星期都有碰頭，唔使食飯都可以傾到嘢喇！
但另一位建制派議員就話，依家大家都好忙，所以未有安排飯局，譚耀宗冇講過唔再搞。佢仲話其實飯局都有一定存在價值，可以同官員交流吓，相信適當時候會再約過喎！
特首答問大會亦延遲
除咗建制派飯局不了了之外，特首答問大會亦因為佔領行動延遲，公民黨郭家麒上星期就去信內會主席梁君彥，要求佢同政府反映盡快安排CY到立法會。消息人士透露，保安局做過風險評估，認為特首到立法會屬高風險，所以一日佔領行動唔結束，或者至少立法會範圍清咗場，否則答問大會都好難搞得成。特首辦就回覆話，會審視情況喺適當時間安排特首出席答問會，維持一年出席四次的慣例。