中環出更：KK手機「狼叫」 開會險被趕
手機鈴聲因人而異，好多人鍾意用音樂或流行歌曲做鈴聲，工聯會立法會議員黃國健（KK）就對狼叫聲情有獨鍾，因為貪佢夠大聲。不過上星期四喺立法會會議上，KK唔記得將電話校去靜音模式，結果莊嚴嘅會議廳突然爆出「呀嗚」一聲，搞到代主席梁君彥（Andrew）面黑，差啲以行為不檢為由將KK趕出會議廳。
唔記得校靜音模式
KK話，當日大約十二點幾，佢嘅手提電話突然響起，由於會議廳當時特別寧靜，所有在席議員都清楚聽到佢電話發出嘅狼叫聲。雖然KK第一時間撳熄個電話，但Andrew仍然面露不悅，警告KK如果電話再響，就會即刻趕佢出會議廳，嚇到KK即刻將電話校番靜音。
經此一役，KK仍然唔肯停用「狼叫」電話，事關個鈴聲夠響夠大聲，佢先至聽到人哋打畀佢喎！KK仲自爆，以前開會時都試過電話響，不過主席曾鈺成無乜話過佢，但Andrew就不時同佢投訴個電話鈴聲太難聽，唔通Andrew對狼有偏見？
卓妮