中環出更：掃茅台A股 吳永嘉想對沖？
買股票對沖花費，係唔少股民的智慧。例如買港鐵股票，就可以透過派息分紅分享加價的甜頭，減輕作為乘客對加票價的肉痛感。鍾意飲茅台酒的中華廠商聯合會副會長吳永嘉（Jimmy），多年嚟使咗唔少錢買茅台，最近趁滬港通實施首日，急不及待用六位數字掃入茅台A股，認真識計數。
「唔記得」咩價位入貨
早前廣東社團總會青委舉行十一周年晚宴，Jimmy都有到場。佢笑言睇好茅台酒價格近年跌至低位，係時間入啲股票。咁佢用乜嘢價位入貨？Jimmy話唔記得，交畀經紀話晒事喎！汕頭商會會長葉振南都話心儀茅台股票，但外圍市況波動，要睇定啲先。佢睇好人民幣在香港取消兌換限制後，銀行以高息搶客，佢都心思思想存埋一份添！
林凱章鼓勵青年學多啲
講番當日活動，青委主任林凱章（Victor）拍住籌委會主席霍啟山（Eric）搞派對，多個青年團體領袖雲集，包括全國青聯副主席陳仲尼、茅台之友協會青委主任莊家彬、菁英會主席梁宏正等。大家話題離不開傾吓疏導青年怨氣。Eric話，前進唔可以一步登天，要喺理想同現實中知所進退。
Victor就鼓勵年輕人睇多啲、學多啲，眼光開闊啲，自然就搵到新天地。
裕華國貨董事長余國春兒子余偉傑（Andrew）都喺度，Andrew曾幫新加坡打理投資基金，去年二月返港接掌家族生意，依家喺裕華擔任總監一職，上任頭炮係將佐敦裕華大裝修。有五十五年歷史嘅裕華會變成點？大家拭目以待喇！
卓妮