被稱為「雨傘運動」嘅佔領行動至今已五十四日，由當初佔領政府總部東翼前地及衝擊警方防線，到後期衝擊龍和道，行動已經變晒質，點知尋日凌晨仲發展到衝擊立法會，撞毀玻璃門，令好多人擔心唔知幾時同點樣先可以收科。民主黨立法會議員黃碧雲就好淆底，叫學聯、學民思潮要認真諗吓將雨傘運動轉型，改為落區宣傳，令到把遮「開有時、收有時」，唔係最終收唔到遮，被人亂咁揈，只會令該黨以至泛民主派嚟緊區議會選舉被人「埋單找數」喎！咁驚青嘅話，就唔好參與佔領行動啦！
