講五分鐘都未到重點
最近政圈就流傳，前行政會議成員林奮強就係呢類人士，無論喺機場管理局或大嶼山發展諮詢委員會都惹人不滿。
話說有次機管局某委員會開會，原定會議時間係四十五分鐘，大家輪流發言都好哋哋，但林奮強一坐低，就向其他人派發背景資料。咁梗係好啦，但點知佢話要講四十分鐘喎，即刻搞到其他委員想走人，好彩委員會主席講明只畀佢發言五分鐘，可惜佢講足五分鐘都未到重點，結果當然無人知佢想講乜啦。
另一個係大嶼山發展諮詢委員會，聽聞林奮強喺入面離晒題，唔知同大嶼山發展有乜關係，其他委員看在眼內唔出聲。對於呢啲指控，我哋都搵過畀林奮強問佢點睇，但佢電話就長期無人聽。