政情：商戶趁工展博一鋪
佔領行動持續近兩個月，唔少位處三大佔領區嘅商戶叫苦連天，日日猛呻生意受拖累。咁啱年尾喺維園即將舉行一年一度嘅工展會，負責營辦工展會嘅中華廠商聯合會（廠商會）本來都好擔心銅鑼灣人流疏落，令廠商參展意欲大大降低，點知實況剛剛相反，就算攤位加租都出現超額報名情況，唔通班參展廠商想趁呢次工展會為今年業績標尾會，藉機殺出一條血路？
工展會係城中盛事，但今年廠商會遇上唔少阻滯，首先係康文署嗰關。話說去年康文署仲係馮程淑儀做署長時，不時有人投訴維園擺工展會期間少咗場地踢波，之後康文署又臨時話要大幅加租，由本來只收門券嘅總收入一成，改為再額外加收總收入嘅百分之七至八，令場地租金變相急增近四倍。廠商會心諗今年租情分分鐘凍過水啦，但新任署長李美嫦接任後，將租金計法照返上年一樣，即時放下心頭大石。
搞買一送一門票
解決完康文署問題，點知又爆發佔領行動事件，廠商會起初好擔心銅鑼灣都有佔領行動，以為市民唔敢到銅鑼灣消費，參展商為封蝕本門，都寧願退租好過。點知實況同佢哋估計剛剛相反，班商戶可能因為近期生意慘淡，反而希望趁工展會博番一鋪，諗住喺年尾盡賺現金補番條數，所以唔單止無參展商退租，報名數目仲不跌反升，反應仲熱烈過之前幾年。
雖然報名參展商有上升趨勢，但廠商會都唔打算趁火打劫。負責工展會嘅廠商會副會長吳永嘉（Jimmy）就話，今年首三季普遍零售業市道都已經麻麻哋，再加上爆發佔領行動，令唔少中小企都受到雙重打擊。佢話，廠商會搞工展會都係為咗幫班參展商，所以決定租金加幅維持喺單位數字，其他成本就由廠商會一力承擔。為咗吸引更多人流，廠商會仲出盡法寶，準備搞個大抽獎同買一送一門票優惠，睇嚟今次參展商可以開香檳喇。